Закрыть
Логин:
Пароль:
Забыли свой пароль?

Войти    

Тываның Баштыңы спорт яамызынга профессионал спортчуларга шынарлыг эмчи хандырылгазының системазын тургузарын онааган

Тываның Баштыңы спорт яамызынга профессионал спортчуларга шынарлыг эмчи хандырылгазының системазын тургузарын онааган 05.05.2016
 Май 3-те Иван Ярыгин аттыг спорт комплекизинге Тываның Баштыңы Шолбан Кара-оол, бо чылдың апрельде Польшага сумонуң Европа маргылдаазынга тиилээн спортчулар-биле ужурашкан. 
 «Делегей чергелиг маргылдаага бистиң оолдарывыс база катап бедик көргүзүглерни чедип алган. Бо чайын Моолга эртер делегей чемпионадында чурттуң чыынды командазының составынга хүрежир Эрес Кара-Салдан эки түңнелди манап турар бис. Тывада спорт-биле белеткенириниң байдалдары бүрүн бар, ындыг болзажок профессионал спортчуларга шынарлыг эмчи үделгези херек деп түңнелге келдивис. Бистиң оолдарывыс өске регионнар дээш эвес, а төрээн Тывазының чыынды составынга хүрежир ужурлуг. Улуг хоорайларга чеде бээрге, ында байдал Тывадан, бажыңындан көңгүс өске, бир эвес көргүзүглери бичии-ле кудулай бээр болза, олардан ойталап кааптып болур. Ол талазы-биле ажылдаарын Спорт яамызынга даастым» - деп, «Тува 24» телеканалга интервьюзунда Шолбан Кара-оол чугаалаан. 
 Тываның Баштыңы-биле ужуражылгага аныяктар политиказы база спорт сайыды Юрий Ооржак, сумога Тываның командазының кол тренери Адар Куулар биле тиилээн спортчулар, оларның аразында республиканың Чаан мөгези Эрес Кара-Сал, Арзылаң мөге Сайын-Белек Тюлюш база хостуг хүрешке алдарлыг спорт мастери, Европаның үш дакпыр чемпиону, Россия чемпионаттарының каш дакпыр призеру Опан Сат киришкен.
 «Мурнувуста Улан-Батор хоорайга эртер делегей чемпионады бар. Аңаа бистиң билдингир мөгевис Эрес Кара-Сал киржир – деп, сумога Тываның командазының кол тренери Адар Куулар чугаалаан. – Бөгүн Тываның Баштыңы-биле ужуражылгада спортту, ылаңгыя спортчуларны деткиириниң дугайында хөйнү чугаалаштывыс. Шолбан Валерьевич спортчу медицинаже онза кичээнгейни углап, улуг тиилелгелерни чедип алыр деп бодазывысса, ону бедик деңнелге тудар ужурлуг деп түңнеди». 
 Шолбан Кара-оол ужуражылга соонда спортчуларга тиилелгени болгаш чедиишкиннерни күзээш, тураскаалдыг белектерни сөңнээн.

Возврат к списку