Закрыть
Логин:
Пароль:
Забыли свой пароль?

Войти    

Ту-154 айыыл-халавынга мөчээн Халиловтуң адын Тываның филармониязынга тыпсыр чадавас

Ту-154 айыыл-халавынга мөчээн Халиловтуң адын Тываның филармониязынга тыпсыр чадавас 27.12.2016
 Сочиге Ту-154 авиакатастрофага мөчээн Александров аттыг ансамбльдиң уран чүүл удуртукчузу Валерий Халиловтуң адын мөңгежидер саналды Тываның Баштыңы Шолбан Кара-оол республиканың чурттакчыларынга киирген. 
 "Хүндүлүг чаңгыс чер-чурттуглар! Кажыыдалдың бо хүнүнде мындыг чүүлге хамаарыштыр силерниң бодалыңарны дыңнаксадым. Генерал Халилов чоннуң уран чүүлүн болгаш культуразын хөгжүдеринге көскү салдарны болгаш дузаны көргүскен деп бодаар мен. Бодунуң ансамбли-биле эң-не ыраккы кожууннарга чедип, улуг концерттерни бараалгаткан» - деп, регионнуң баштыңы Facebook четкизинде бодунуң арнынга бижээн.  
 «Халилов бистиң хөгжүм коллективтеривистиң, ылаңгыя үрер болгаш симфониктиг оркестрлерниң профессионал тургузуушкунунга киришкен» - деп онзалап айыткан. 
 "Ол бистиң ыдык ырывыстың хөгжүм каасталгазын эдип-чазаан. Тываның девискээринге ооң алдар-адын мөңгежидериниң дугайында кады боданып көрээлиңер! Тыва Республиканың уран чүүлүнүң алдарлыг ажылдакчызы Валерий Михайлович Халиловтуң адын республиканың филормония бажыңынга тыпсыр деп саналдыг мен. Россияның алдарлыг оглунга мөңге сактыышкын ол болур» - деп, Ш. Кара-оол бижээн.  
 Улуг-хүнде эртен, РФ-тиң Камгалал яамызының Ту-154 самоледу Кара далай кыры-биле Сирияже ужуп чор чорааш, айыыл-халапка таварышкан. Бортка 92 кижи – экипажтың 8 кежигүнү база 84 пассажир, оларның аразында 8 шериг албанныглар, Александров аттыг ансамбльдиң 64 артизи, НТВ, "Звезда" база Бирги канал российжи телевидениениң 9 төлээзи, Доктор Лиза деп хөйге-чарга билдингир, «Чөптүг дуза» ачы-буян фондузунуң баштыңы Елизавета Глинка, федералдыг ийи күрүне албан-хаакчызы чораан.


Возврат к списку