Закрыть
Логин:
Пароль:
Забыли свой пароль?

Войти    

«Енисейская» куш фабриказы планнатынган хемчегни ап эгелээн

 «Енисейская» куш фабриказы планнатынган хемчегни ап эгелээн 10.01.2017
 «Енисейская» куш фабриказында дагааларны мөөңү-биле соп эгелээни ол бүдүрүлге чериниң одалга системазынга болган үрелиишкиннер-биле кандыг-даа харылзаа чок дээрзин Чазак Даргазының агроүлетпүр комплекизин харыылап турар оралакчызы Байбек Монгуш дыңнаткан. 
 Тодаргайлаарга, декабрь 31-ден январь 1-же дүнезинде 19 муң бройлер дагаа турган блоктуң чылыдылга хоолайларының бирээзинге үрелиишкин болган түңнелинде, ол чер чылыдылга чок арткан. Хамааты камгалалының болгаш онза байдалдар албанының камгалакчылары дарый келгеш, чылыдылга пушкалары-биле дагаалар турган блоктуң иштин чылыдып турган кадында, 370 дагаа сооктан хораан. Арткан дагааларны камгалап четтигипкен. 
 Эътке дужаар дагаалары ажаап өстүрериниң технологиязын езугаар дагаа чуургазы чазылга соонда, 45 хонук иштинде эки семиртир азыраптарга, деңзизи 2,5 кил чедип турар апаар. Ынчангаш фабрика январь 2-ден эгелеп дагааларны соккаш, эъдин дужаарын черле планнап турган. Одалга системазынга болган озал-ондак бо планнаттынган хемчеглер-биле капсырлажы бергени анаа-ла таварылга-дыр дээрзин Байбек Монгуш тайылбырлаан.  
 Бо хүннерге чедир 19 муң дагааның эъдин болбаазыраткаш, ветеринарлыг хыналдаже чоруткан. Бүдүрүлге чери дагаа эъттерин садып-саарган түңнелинде ажылдап алган акшазы-биле ажылчыннарның шалыңын төлээр болгаш чырык, чылыг дээш өрелерин дуглаар.

Возврат к списку