Закрыть
Логин:
Пароль:
Забыли свой пароль?

Войти    

«Хевел» компания бөлүү Тывага 1600 киловатт күчүлүг хүн электростанциязын тудар

«Хевел» компания бөлүү Тывага 1600 киловатт күчүлүг хүн электростанциязын тудар 06.09.2017
Ооң дугайында дугуржулганы Тываның Баштыңы Шолбан Кара-оол биле «Хевел» компания бөлүүнүң чиңгине директору Игорь Шахрай чарган.  
 Владивостокта эртип турар Чөөн чүк экономиктиг шуулган үезинде ийи тала хүн энергиязының автономнуг гибридтиг чырык станциязын тудуп, Тыва Республиканың чедери берге чурттакчылыг пунктуларында чырык хандырар адырда кады ажылдажылга дугайында дугуржулгага атты салган. 
 Дугуржулгада Тывага 1600 киловатт ниити күчүлүг, гибридтиг хүн-дизелдиг чырык хандырар станцияны тудары көрдүнген. Төлевилелдиң инвестору «Хевел» компания бөлүүнүң инжиниринг салбыры болур. Компания төлевилелди боттандырары-биле, Новочебоксары хоорайда бодунуң заводунда бүдүрген бедик шынарлыг хүн модульдарын эккеп салыры планнаттынган. Тыва Республиканың Чазаа, бодунуң ээлчээнде, төлевилелди бүгү талалыг информастыг болгаш организастыг деткимче-биле хандырар. 
 «Бир дугаарында, ол төлевилелди ЛЭП шөйер аргазы чок, дизельдиг электри станциялары-биле чырыкты берип турар, чедери берге чурттакчылыг черлерге боттандырарынга сонуургалдыг бис. 14 муң хире чурттакчылыг, 18 ындыг суур бар. Ол айтырыг талазы-биле күрүне-хуу эштежилгени киириштирериниң шупту аргаларын өөренип көрдүвүс» - деп, Тываның Баштыңы Шолбан Кара-оол демдеглээн. 
 Чедери берге, кыйыы черлерде чурттакчы чонну үзүк-соксаал чок, турум чырык-биле хандырар мурнады боттандырар күрүне айтырыы хүн энергиязын ажыглаан ук төлевилел күүселдези-биле шиитпирлеттинер.  
 Ол ышкаш республикага төлевилел күүселдезиниң үезинде объектилер тудуундан регион бюджединче үндүрүглер киирилдезин көвүдедир, станцияның тудуг-монтаж ажылдарынга чаа ажылчын олуттар тургустунуп, чагылар конструкцияларын бүдүреринге регионнуң бүдүрүлгелерин түр када хаара тудар.  
 Россияда хүн энергетика адырында эң-не улуг каттышкан компания «Хевел» компаниялар бөлүү (2009 чылда «Ренова» КК биле РОСНАНО АН каттышкан бүдүрүлгени тургускан) болур. Компанияның структуразында: бүдүрүрүкчү салбырлар (Чуваш Республиканың Новочебоксары хоорайда хүн модульдарын бүдүрер завод), девелопер салбыры (чоокку чылдарда 434 МВт-дан хөй күчүлүг хүн электростанцияларын дөзевилеп, тудар төлевилелдер портфели) база Россияда хүн энергетиказын шинчилеп турар чаңгыс-ла эртем организациязы - энергетикада чуга карттыг технологияларның эртем-техниктиг төвү (Санкт-Петербург хоорай) бактааттынган.

Возврат к списку