Закрыть
Логин:
Пароль:
Забыли свой пароль?

Войти    

Тыва политиктиг турум байдалы-биле шүглүкчүлер санында

Тыва политиктиг турум байдалы-биле шүглүкчүлер санында 11.01.2018
«Петербургская политика» фондунуң белеткээни рейтингиде Россияның эң-не тайбың регионнарының санында Тыва хевээр арткан.   
Декабрь шинчилелдериниң түңнелдери-биле республика 2017 чылда быжыг турум байдалдыг регионнар бөлүүнде артып, ол көргүзүү-биле тергиин дээн «20-ниң» санынче кирген. Тыва Сибирь федералдыг округда Томск облазының соонда, ийиги черни ээлеп турар.  
Рейтингиниң тургузукчуларының бодалы-биле алырга, декабрьда республиканың туружунга эки демдектерни үш болуушкун эккелген. Ооң бирээзи – РФ-тиң Чазааның даргазының оралакчызы Аркадий Дворковичиниң хуралында Элегест – Кызыл – Курагино демир-орук адырын тударының инвесторлар-биле концессиялыг дугуржулгазын чедип алганы болган.  
Оон аңгыда чыл төнчүзүнде, РФ-тиң Президентизиниң чанында Россияның улус ажыл-агыйы база күрүне албаны академияның филиалы – Сибирьниң эргелеп-башкарылга институду-биле кады ажылдаар дугуржулгага Тываның Баштыңы Шолбан Кара-оол атты салган. Дээди өөредилге чери дугуржулга негелдези езугаар республикадан абитуриентилерге тускай сорулгалыг олуттарның санын көвүдеткен. 
Найысылал Кызылда, чаа, 4 сылдыстыг AZIMUT Эне-Сай Отель аалчылар бажыңын ажытканы регионга онзагай болуушкун болган. Туризмни хөгжүдеринге, ылаңгыя VIP-аалчыларны хаара тударынга ол объект улуг рольду ойнаары чугаажок. Республика Баштыңы бо чоокку чылдарда мурнады хөгжүдер угланыышкын ол деп чарлаан. VIP-аалчыларга турисчи баазаларны ыраккы кожууннарга тударын 2018 чылда Тывага эгелээр.
«Петербургская политика» фондунуң рейтингизин 2012 чылдың күстен бээр ай санында парлап турарын сагындыраал. Россия Федерациязының шупту субъектилеринде социал-политиктиг турум чоруктуң деңнелин ол үнелеп турар. Фондунуң эксперттери турум чоруктуң деңнелин 10 санныг: 10 - эң улуг, 1 – эң эвээш демдек-биле үнелээр. Социал-политиктиг турум байдалының чадазы-биле регионнарны рейтинг иштинде 5 бөлүкте чарган, ол ышкаш сөөлгү айда рейтингиде шимчээшкини-биле бодунуң бөлүүнде база аңгылаан.

Возврат к списку