Закрыть
Логин:
Пароль:
Забыли свой пароль?

Войти    

«Натура Сиберика» компания Тыва дугайында номну Алла Пугачеваның допчу-намдарының авторунга чагаан

«Натура Сиберика» компания Тыва дугайында номну Алла Пугачеваның допчу-намдарының авторунга чагаан 20.02.2018
«Натура Сиберика» компанияның ээзи Андрей Трубников Тыва дугайында номну бижииринче билдингир россижи журналистер Алексей Беляков биле Максим Мармурну хаара туткан. Республика Баштыңы Шолбан Кара-оол ооң дугайында бодунуң блогунда дыңнаткан. Журналистер бижиир номунга материалдар чыыры-биле Тывада келгеш, бир дугаарында чазак даргазы-биле ужурашкан.
 Алексей Беляков 1990 чылдан бээр журналистикада. «Московские ведомости»-ге, «Столица», «Парадокс» сеткүүлдерге, неделя санында үнер «Семь дней» солунга ажылдаан. Беляковтуң 1997 бижээни, бестселлер апарган «Алка, Аллочка, Алла Борисовна» деп Алла Пугачеваның баштайгы долу допчу-намдарының ному Россияда чогаалчы алдар-атты аңаа эккелген. «Вторая дверь» биле «Шарманщик» деп романнары, «Парни из стали» деп 12 сериялыг боевик кинога сценарийи ооң чогаалчы ажылдарының санында. 
Максим Мармур фоточуруктар репортажының талантылыг мастери кылдыр билдингир. «Изиг черлерде» дайынчы операциялардан эгелээш, Кремльде хүлээп алыышкыннарга чедир аңгы-аңгы черлерге тырттырбышаан, делегейде башкарыкчы агентилелдер Associated Press база France Press-ке репортерлап хөй чылдарда ажылдаан. Time, Guardian, The Times, Washington Post, NY Times, LA Times, GQ Italy, GQ Russia, Madame Figaro, Stern дээш өске-даа үндүрүлгелер ооң фоточуруктарын парлаан. Ол кылагар даштыг билдингир сеткүүлдер болгаш улуг компаниялар-биле кады ажылдап, бөгүнде реклама тырттырар эң-не хереглелдиг фотографтарының бирээзи.  
«Натура Сиберика» компания черлик үнүштер болгаш натуралдыг чиг-эт ажыглаан органиктиг косметиканы бүдүрер ажыл-чорудулгалыын сагындыраал. Компания Тыва-биле кады ажылдап, эм шынарлыг чыжыргананы база ховар мал – сарлыктың сүдүн бүдүрүлгеде ажыглап турар. Андрей Трубников бодунуң продукциязын алдаржыдар дээш республика дугайында бижиирин бодаваан. Тываның бойдус чурумалы, тываларның тускайлаң культуразы бизнесменни кайгадып, өскелерге республика дугайында таныштырар бодалды бодараткан.  
«Россияда билдингир бизнесменнерниң бирээзи, "Натура Сиберика" компанияның ээзи Андрей Трубников бистиң республикага бир-ле ажыктыг чүүлдү кылзымза деп шагда-ла күзээн. Бистиң кижи четпээн бойдус байлаавыс, кайгамчык культуравыс, арыг-чаражы ону шагда-ла сорунзалапкан. Бистиң чуртувусту билип алганының дугайында өскелерге чүге дамчыдып болбас деп? Тываның база тываларның дугайында хажыызындан көрүштүг, бо бүгүнүң, бойдус байлааның үнезин билир кижиден оон эки дуза кайда боор. Холдарывыс тудуштувус. Натура Сиберика акшаландырар...» - деп, Тываның Баштыңы Шолбан Кара-оол Трубников-биле дугуржулгазын соцчеткиге дыңнаткан.

Возврат к списку