Закрыть
Логин:
Пароль:
Забыли свой пароль?

Войти    

Тываның Баштыңы өгбелер ханы хүндүткелде деп демдеглээн

Тываның Баштыңы өгбелер ханы хүндүткелде деп демдеглээн 16.03.2018
Тываның Баштыңы «Эки турачы мөңгүн назын» деп волонтерлар клувунуң хоочуннары-биле ужурашкан.  
Ооң кол сорулгазы – улуг назылыг кижилерни деткип, оларга дуза көргүзери. Шолбан Кара-оол бодунуң ажыл-агыйжы сагыш човаашкынын улуг назылыглар-биле үлежип, оларны республиканың амыдыралынга идепкейлиг киржип, «шын орукту айтып дузалажырынче» кыйгырган.  
Республиканың Баштыңы хоочуннар-биле доктаамал ужуражып харылзажыр хемчеглерни ыяап-ла сайзыраңгайжыдарын дыңнаткан. Салгалдар аразында харылзааны быжыглап, улуг кижилер дээш сагыш аарып, улуг өгбелерни ханы хүндүлээри чугула.  
«Тыва болгаш орус чоннарның чаңчылдарында, черле ниитизи-биле хөй национал Россияның езу-чаңчылдарында удур-дедир дуза көргүзери кандыг-даа берге үелерде амыдырап чурттаарынга дузалап келген. Бистиң сеткил-хөөнүвүс улуг өгбелеривис-биле тудуш. Бурунгаар шимчээшкин арга-дуржулга, езу-чаңчылдарга үндезилеттинип тургустунар кылдыр, улуг салгал харыысалгалыг болгай. Ол бүгү чокта уг-шиг көзүлбес. Боттарының үнген дөзүн уттуп алыр чон чиде бээр. Чонунуң төөгүзү чокта бурунгаар шимчээри болдунмас. Черле ынчаш бис улуг өгбелеривистиң ачызында амыдырап-чурттап чоруур болгай бис. Бо ужуражылга дээрге бистиң өгбелеривистиң биске арттырып каан үндезиннеринче эглиишкин-дир. Төрел харылзаавыс быжыг бооп, улусчу ужур-чаңчылдарывысты сагып чоруур болзусса, төттүнмес күжүвүс ында. А ооң кол суртаалчылары бөгүнгү хоочуннарда. Эки турачы ажыл-херектерге оларның үлегерлиг чижээ, байлак арга-дуржулгазы аныяктарга өөредиглиг кичээл болур» — деп, Тываның Баштыңы Шолбан Кара-оол чугаалаан.  
Улуг назылыг чаңгыс чер-чурттугларывысты каттыштырып, салгалдар аразында харылзаштырыкчы кол өзек болганы дээш, Тываның Баштыңы республиканың Хоочуннар эвилелиниң активинге өөрүп четтиргенин илереткен.  
Ужуражылга үезинде хоочуннар шимчээшкининиң идепкейжилери Мария Сергеевна Шойдун (75 харлыг), , Елизавета Андреевна Шалган (74 харлыг), Валентина Торукпаевне Ондар (68 харлыг) , Зоя Кертик-ооловна Балчыырак (68 харлыг) , Татьяна Хунаевна Кужугет (58 харлыг) , Ульяна Санчай-ооловна Базырчап (56 харлыг) оларга Тыва Республиканың Баштыңының Хүндүлел бижиктерин тывыскан. 
 Тайылбыр: 
 Тывада 26812 улгады берген назы-харлыг кижилер бар, ооң: 
21043-и 60-74 харлыг, оларның 39 хуузу – эр, 61 хуузу – херээженнер;  
75-тен 90 харлыг назылап кырааннарның саны – 5557 кижи, оларның 30 хуузу – эр, 70 хуузу - херээженнер; 
90 хардан өрү узун назылыглар - 212 кижи, оларның 16 хуузу – эр, 84 хуузу – херээженнер.
Ажылдап турар пенсионерлерниң саны – 13212 кижи.

Возврат к списку