Закрыть
Логин:
Пароль:
Забыли свой пароль?

Войти    

Тываның Баштыңы Соңгу Кавказче албан сургакчылаашкынынче полицияның каттышкан отрядын үдешкен

Тываның Баштыңы Соңгу Кавказче албан сургакчылаашкынынче полицияның каттышкан отрядын үдешкен 27.04.2018
Тыва Республиканың Иштики херектер яамызының каттышкан отряды, Cоңгу Кавказтың девискээринде конститусчу чурумну тударынга дайынчы албан хүлээлгезин алды ай дургузунда күүседир дээш, Чечен Республикаже аъттаныпкан.  
ТР-ниң ИХЯ-зының каттышкан отрядын чартык чылдың сургакчылаашкынынче үдээр чаңчылчаан байырлыг езулал апрель 26-да эрткен. 
Тыва Республиканың Баштыңы Шолбан Кара-оол, Тыва Республикада кол федералдыг инспектор Александр Вавилихин, Тыва Республиканың иштики херектер сайыды, полицияның генерал-майору Александр Щур, Россияның ОБЯ-зының Тыва Республикада кол эргелелиниң начальниги, иштики албанның генерал-майору Андрей Назаров, Тыва Республикада ИХЯ-ның Хоочуннар чөвүлелиниң даргазы Марат-оол Ондар, ИХЯ-ның регион албаннарының болгаш кезектериниң удуртукчулары, сургакчылаашкынче аъттанып турар ажылдакчыларның чоок кижилери болгаш эш-өөрү байырлыг үдээшкинге келген.
Тыва Республиканың Баштыңы – Чазааның Даргазы Шолбан Кара-оол чагыг-сөстерни ажылдакчыларга берген. «Бөгүн харыысалгалыг хемчегде келген бис. Погоннарлыг кижиге албан сургакчылаашкынынче аъттаныры - улуг алдар. Силерниң албан хүлээлгеңерде бактааттынган күрүне херээн эрттирер силер. Төрээн болгаш чоок кижилериңер силерни манап турарын утпаңар, бүдүн составыңар-биле, каң кадык, эки сеткил-хөөннүг чанып кээр силер» - деп, ол чагаан.  
Тываның иштики херектер сайыды, генерал Александр Щур: - «Нарын оперативтиг болгаш дайынчы байдалдыг регионнарже бистиң ажылдакчыларывыс 1995 чылдан бээр чоруп турар. Чурттуң удуртулгазы база Россияның ИХЯ-зының удуртулгазы оларның арга-дуржулгазынга бедик үнелелди берип турар. Силерниң 97 эш-өөрүңер күрүне шаңналдарынга төлептиг болган, оларның 12-зинге орденнерни тывыскан. Силерниң араңарда бир дугаар чоруп турар ажылдакчылар база бар, олар база ажылдың харыысалгалыын билир» - деп, демдеглээн.  
Сайыт сургакчылаашкын үезинде оларга даандырган албан хүлээлгезин сагып, харыысалгалыг болурун отрядтың дайынчыларындан негээн. Генерал-майор Щур каттышкан отрядтың ажылдакчыларынга шыдамык чорукту, чедиишкинни, амыр-тайбыңны, өг-бүлелеринге чыргалды, коллективинге эп-найыралды күзээн. «Төрээн чурт бодунуң оолдарын кезээде манап турар, дедир ээп чанып келириңерни манадывыс. Ак орукту, чедиишкиннерни күзедивис!» - деп, ол төндүрген.  
ИХЯ ажылдакчылары Соңгу Кавказ регионунуң девискээринге корум-чурумну болгаш хамаатыларның айыыл чок чоруун хандырып, иштики херектерниң тус девискээр органнарында боттарының коллегаларынга деткимчени көргүзер. Каттышкан отрядта патруль-пост албанының, ОШАЧКИ-ниң, Экономиктиг айыыл чок чорук база коррупцияга удур хөделиишкин эргелелиниң, Наркотиктер саарылгазынга контроль эргелелиниң, Тыва Республикада ИХЯ-ның муниципалдар аразының ажылдакчылары кирген. Шупту ажылдакчылар теоретиктиг болгаш практиктиг белеткелди эрткен. 
Дыка хөй полицейжилер Соңгу Кавказ регионунче бир дугаар чоруп турар. Бо регионга албан хүлээлге эрттирериниң онзагайын олар билир, боттарының коллегалары-биле арга-дуржулганы база солчурлар. 
 Тыва Республикада ИХЯ-ның парлалга албаны

Возврат к списку