Закрыть
Логин:
Пароль:
Забыли свой пароль?

Войти    

Тывага "Наадым-2018" малчыннар байырлалы июльдуң 14 база 15 хүннеринде болуп эртер

Тывага "Наадым-2018" малчыннар байырлалы июльдуң 14 база 15 хүннеринде болуп эртер 23.05.2018
Тыва Республиканың чоннуң байырлалы – Наадым-2018 июльдуң 14-15 хүннеринде болуп эртер.  
Тыва Республиканың Чазаа чогуур доктаалды хүлээп алган. Кызыл кожууннуң Тос-Булакка байырлал хемчеглерин эрттирер. 2018 чылда Тывада чарлаан Биче суурларны хөгжүдер чылга тураскаадып, республиканың организастыг комитеди байырлалдың планын ажылдап тургускан.  
"Бо чылын Наадым байырлалын бир ай бурунгаар эрттирер бис. Ооң мурнунда чылдарда байырлал Тыва Республиканың хүнү-биле капсырлажып турган. Август айда мал чемин белеткээр кидин-түлүк үе-биле холбаштыр, ону бурунгаар чылдырган. Көдээ ишчилер, ылаңгыя «Аныяк өг-бүлеге кыштаг» төлевилелдиң аныяк малчыннары малынга кыжын чиир чемни – сиген-ширбиилди кезип белеткеп алыр эптиг үези» - деп, Тыва Республиканың Чазааның Даргазының оралакчызы Байбек Монгуш тайылбырлаан.  
"Наадым-2018" байырлалы республиканың малчыннар съездизи-биле эгелеп, аңаа көдээ ажыл-агыйының чугула айтырыгларын болгаш келир үезин сайгаржып чугаалажыр.  
Байырлал хүннери суббота биле улуг-хүнде таваржы бергени-биле, ол дыштаныр хүннерни июльдуң 16 – понедельникче база июльдуң 17 – вторникче шилчиткен. «Тыва Республиканың байырлал хүннериниң дугайында» Тыва Республиканың Хоойлузу езугаар, Тыва Республиканың хүнү, ТР-ниң Конституция хүнү, чоннуң «Шагаа» болгаш «Наадым» байырлалдарын эрттирер хүннер ажылдавас байырлалдар хүннери кылдыр санаттынарын сагындыраал.

Возврат к списку