Закрыть
Логин:
Пароль:
Забыли свой пароль?

Войти    

Тываның найысылалында хөй квартиралыг базa бир бажың дужааттынган

Тываның найысылалында хөй квартиралыг базa бир бажың дужааттынган 16.08.2018
Кызылдың чөөн кезээнде Дружба кудумчузунда, хөй квартиралыг 32 «б» дугаарлыг база бир бажыңның дүлгүүрлерин Тыва Республика хүнүнде байырлыг байдалда тывыскан.
Тываның тудуг болгаш ЧКА сайыды Евгений Овсянников өөрүнчүг болуушкун-биле чаа бажыңче көжүп киргеннерге байырны чедирген. 
"Энергострой" тудуг компаниязының директору Николай Крапивин кызыл кожааны кескен. "Энергострой" КХН-ниң тудуг организациязы аварийлиг бажыңнардан өскээр көжүрер программа чорудуу-биле үжен квартиралыг бажыңны туткан.
 Дмитрий Крапивин, "Энергострой" КХН директорунуң оралакчызы:  
— Ниити шөлү 5573 дөрбелчин метр, хөй квартиралыг дөрт бажыңны 2017 чылда тудуп эгеледивис. Бажыңнарны кончуг шалыпкын, шынарлыг тудуп доостувус. Үш бажыңда чырык, чылыг 30 квартиралар бар. 40 квартиралыг бажың база бар. Бо чуртталга комплекизинде амыдырап-чурттаарынга таарымчалыг шупту байдалдар тургустунган. Бөгүн Дружба кудумчузу, 32 "б" деп адрестиг бажыңны дужаап турарывыс бо.  
Чаа бажыңда квартира алыкчылары, оларның чоок кижилери база эш-өөрү өөрүшкүзүн үлежир дээш байырланчыг хемчегде өг-бүлелери-биле чыглып келгеннер. 
Дружба кудумчузунда бажыңче көжүп кирерин шагда-ла күзээн Надежда Рязанова:  
-Школа, садик, эмнелге, аптека, садыглар, автобус доктаамының чоогунда бо бажыңче көшкен болзумза деп, дыка-ла идегеп турдум. Күзелим бүткен! Соңгадан көөрге аянныын – арыг, чаагайжыткан шөл, уруглар ойнаар черлер. Чырык, делгем үш өрээлдиг, ийи балконнуг квартира! Чаа кожаларлыг болганымга канчаар-даа аажок өөрүдүм! Республика чазаанга база хоорай чагыргазынга болгаш тудугжуларга четтирдивис! Онзагай байырлал – Тыва Республиканың хүнү-биле Тываның бүгү чонунга байыр чедирип тур мен!  
Нина Дандыгай оглу Буянга база ооң өг-бүлезинге байыр чедирер дээш четтикпейн келген:
— Ажы-төлүм дээш дыка амырап тур мен! Каш-ла базым черде школа биле садиктиг, чараш, улуг бажыңга чурттаарлар. Бир дугаарында, найысылалдың мэри Владислав Товарищтайович Ховалыгга улуу-биле четтиргенивисти илереттивис! Ол ынак хоорайывыстың чаагайжыдылгазы болгаш хөгжүлдези, чону дээш сагыш човап, кызымак ажылдап чоруур! 
Чаа квартираларның дүлгүүрлерин Дзержинский, 5; Семирадский, 43; Комсомольская, 36 "а"; Медицинский, 6, 8, 9; Новоселов, 36, 31; Красноармейская, 59, 74; Кечил-оол, 41 бажыңнарның чурттакчылары алган.

Возврат к списку