Закрыть
Логин:
Пароль:
Забыли свой пароль?

Войти    

Тывада Россия Федерациязының Күрүне тугунуң хүнүнде чалыы хамаатыларга паспорттарны тывыскан

Тывада Россия Федерациязының Күрүне тугунуң хүнүнде чалыы хамаатыларга паспорттарны тывыскан 22.08.2018
Бөгүн, август 22-де, Тыва Республиканың Чазак бажыңының баарынга, Россия Федерациязы биле Тыва Республиканың күрүне туктарын көдүрер байырлыг езулал эрткен. 
Чазак кежигүннери, Дээди Хуралдың депутаттары, корум-чурум камгалаар органнарның удуртукчулары, Кызылдың Төлээлекчилер хуралының депутаттары, яамылар болгаш ведомстволар төлээлери хемчегге киришкен. 
"Эш, Тыва Республиканың Баштыңы! Россия Федерациязы биле Тыва Республиканың күрүне туктарын көдүреринге республиканың шериг кезектериниң база корум-чурум камгалаар органнарының парад бөлүктери чыскаалган» - деп, ТР-ниң шериг комиссарының хүлээлгезин түр када күүседип турар полковник Николай Францевич илеткээн.  
Тываның Баштыңы Шолбан Кара-оол республиканың шериг кезектериниң, корум-чурум камгалаар органнарның парад бөлүктеринге, байырлыг езулалдың шупту киржичкилеринге база аалчыларга байырны чедирген. Тыва Республиканың Чазааның Үрер хөгжүм оркестриниң күрүнениң ыдык ырылар аялгазының үделгези-биле туктарны көдүрген. «Россияның десанчылар эвилели» хөй-ниити организациязының төлээлери Россия Федерациязы биле Тыва Республиканың күрүне туктарын киискиткен.  
Россия Федерациязының хамаатызының паспорту – хамааты кижиниң бүрүн эргелерин бадыткап турар кол документ дээрзин бөгүн демдеглээн. Тываның Баштыңы Шолбан Кара-оол, ТР-де кол федералдыг инспектор Александр Вавилихин база Дээди Хуралдың комитет даргазы Виктор Глухов аныяк хамаатыларга паспорттарны тывыскан. Каа-Хем суурнуң 1 дугаар школазының өөреникчизи Эрес Ооржак-биле кады тос школачы чугула докментини алганнар.  
«Россия Федерациязының Күрүне тугунуң хүнүн байырлаан онзагай хүнде паспортту алдым. Харыысалганы билип тур мен. Паспорт алыр дээш, бо хүннү дыка манап турдум. Шупту оолдарга кадыкшылды болгаш эки өөредилгени күзедим!» - деп, Эрес чугаалаан.  
Байырлыг езулал үезинде, Россия Федерациязынга чурттаар эргелиг шынзылгаларны база тывыскан.«Россия Федерациязының хамаатызы болурунуң дугайында» амгы федералдыг хоойлу езугаар, ТР-ниң ИХЯ комиссиязының шиитпири-биле, Украинаның хамаатызы Ольга Иродованы орус дылдың эдилекчизи деп санаан.  
"Тывага, Каа-Хем кожуунга төрүттүнгеш, өскен мен. Элээн каш чылдарда Украинага чурттап турдум. Ам Тожуда, администратор бооп ажылдап тур мен. Бөгүн дыка онзагай хүн болду. Дыка үр сүржүп келген документимни холда алганымга дыка өөрүп тур мен. Ам хамааты эрге дээш бээр мен. Россияның күрүне тугу-биле шуптуңарга байыр чедирдим! Эң кол чүве – тайбың дээрни, кадыкшылды база аас-кежикти күзеп тур мен!» - деп, Ольга Ивановна Иродова чугаалаан. 
Вьетнам Социалистиг Республиканың хамаатызы, Кызылда чурттап турар сайгарлыкчы Нгуен Хоанг Хай база Украинаның хамаатызы, Тываның найысылалында инженер-программист Александр Федотов оларга Россия Федерациязынга чурттаар эргелиг шынзылганы берген. 
Россия Федерациязының Күрүне тугунуң хүнүн 1994 чылда тургусканын сагындыраал. Хоойлу езугаар, РФ-тиң Күрүне тугу доора дургаар дең үш: үстү - ак, ортузу – көк база адаа – кызыл өңнүг дилиндектерлиг дөрт булунчук пөс болур.

Возврат к списку