Закрыть
Логин:
Пароль:
Забыли свой пароль?

Войти    

Тывада хөй ажы-төлдүг өг-бүлелерге «Социал хөмүр-дашты» чедирип эгелээн

Тывада хөй ажы-төлдүг өг-бүлелерге «Социал хөмүр-дашты» чедирип эгелээн 27.08.2018
Бо хонуктарда республиканың кожууннарынче «Социал хөмүр» сөөртүлгези эгелээн. 
Кызыл кожууннуң Кур-Чер суурда хөй ажы-төлдүг үш өг-бүле 2 тонна ажыг хөмүрнү алганын «Тува 24» телеканал дыңнаткан. Ол өг-бүлелер беш болгаш оон хөй ажы-төлдүг. Долаана Ондар чеди уруглуг. Өг-бүлениң херээжен ээзи көдээ библиотекада аштакчы, а эр ээзи сезоннуг ажылдарда.  
"Бистиң өг-бүлевиске дузаны көргүскени дээш, республиканың Чазаанга, чагырга черинге улуу-биле четтирдивис. Ийи тонна хөмүр-даш – дыка улуг деткимче, ам кышты ажарынга эвээш хөмүр немей садып алыр бис. Хөмүр садып алыры база берге айтырыг, машина чугаалажыр, бензинин садар. Камнаттынган акшавыс-биле ажы-төлге идик-хеп садып алыр» - деп, Долаана Ондар "Тува 24" телеканалга чугаалаан.  
Кур-Чер суурнуң социал ажылдакчылар учедунда хандырылгазы кошкак 10 өг-бүле бар. Олар шупту республика Баштыңының эгелээни «Чемгерикчи инек малым» дээн ышкаш, Чазактың социал программаларының доктаамал киржикчилери.  
"Социал хөмүрден" аңгыда «Школаже белеткениринге дузалаш» акция уламчылап турар. «Социал картофель» төлевилел күүселдези-биле чазын картошка үрезини алган өг-бүлелер база бар. Ам дүжүдүн манап тур бис» - деп, Кур-Чер суму чагырга даргазының социал политика талазы-биле оралакчызы Марина Монгуш чугаалаан. 
Тываның Баштыңы Шолбан Кара-оол бюджет нарын-даа болза, «Социал хөмүр» төлевилелди уламчылып, ону алыр кижилерниң санын ам-даа көвүдедирин дааскан. Шынап-ла, «Социал хөмүр» төлевилелдиң киржикчилер саны чылдан чылче көвүдээн. 2016 чылда 702 өг-бүле дуза алган болза, бо чылын хөмүр алыкчыларның даңзызынче Кызыл биле Ак-Довурак хоорайда печка одап турар чурттакчыларны бир дугаар киирген. Адрестиг социал дузаны бүгү республикадан хөй ажы-төлдүг 1010 өг-бүле алыр. Ооң иштинде, чедери берге Тожу биле Тере-Хөл кожууннарда 41 өг-бүле одаар ыяшты алыр. 
Төлевилел киржикчилери ийи тонна ажыг хөмүрнү халас база электри энергиязынга чарыгдалының чамдыызынга компенсацияны чырык берип турар компанияның агар санынче шилчиттирип алырын сагындыраал.

Возврат к списку