Закрыть
Логин:
Пароль:
Забыли свой пароль?

Войти    

Тываның найысылалының мэри - Карим Сагаан-оол

Тываның найысылалының мэри - Карим Сагаан-оол 25.10.2018
Найысылалдың Төлээлекчилер хуралының ээлчеглиг үшкү сессиязының хүн чурумунуң бирги айтырыы - Кызылдың мэрин томуйлаары болган.  
Конкурска үш кижи: Кызыл хоорай мэриниң амыдырал-хандырылга талазы-биле бирги оралакчызы Александр Черноусов, найысылалдың Контроль-саналга палатазының инспектору, "Россияның лидерлери" төлевилелдиң киржикчизи Вячеслав Моломдай база «Тываэнерго» АН-ның чиңгине директорунуң бирги оралакчызы – башкарыкчы директор Карим Сагаан-оол олар киришкен. Кызыл мэриязының парлалга албаны, найысылал парламентизиниң хуралының үезинде Александр Черноусов бодунуң кандидатуразын уштаанын, дыңнаткан. Ийи арткан кордакчыга ажык бадылаашкынны эрттирген. Карим Сагаан-оол эң хөй үннерни алган. 
"Бөгүн, Хуралдың сессиязында, Кызыл хоорайның мэри кылдыр Сагаан-оол Карим Байлак-ооловичини шилип алган. Деңзигүүрлүг шиитпирни хүлээп алган деп бодап тур мен, ооң арга-дуржулгазынга, тура-соруунга, кижилерни дыңнап билиринге бүзүрээр мен. Инженер-электрик кижи, хоорайның улуг ажыл-агыйынга ажылдап каапкан, канчаар ажылды тургузарын билир. Байыр чедирип тур мен!» - деп, Тываның Баштыңы Шолбан Кара-оол бодунуң блогунда бижээн.  
2018 чылдың сентябрь 9-та болган соңгулдалар түңнели-биле, Карим Сагаан-оол 7 дугаарлыг, Төп чаңгыс мандаттыг округдан Төлээлекчилер хуралының депутадынче соңгуткан. Ооң соонда Кызыл хоорайның мэри албан-дужаалга ажылдаар конкурска киржир деп шиитпирлээн. Кызыл хоорайның пассажирлер аргыштырар адырында ачы-дуза чедирилгезин экижидерин, найысылалдың ыжын эвээжедир программаны чада аайы-биле ажылдап кылырын, ылаңгыя долгандыр хүрээлел чүдередип турары дээш торгаалдарны улгаттырарынче күжениишкиннерни углаарын ол чугаалаан. Оон аңгыда чер хамаарылгаларында улуг ажылды кылыр планныг.  
Ооң мурнундагы мэр, амгы үеде Төлээлекчилер хуралының депутады Владислав Ховалыг демниг ажылы дээш хоорай чагыргазының командазынга четтиргенин илереткеш, чаа соңгуткан удуртукчуга планнары чедиишкинниг боттанып турарын күзээн. Кызылдың чаа мэри бодунуң хүлээлгезинче ноябрь 1-де кирер, ол албан-дужаалга 5 чыл ажылдаар.
Карим Сагаан-оол 1977 чылдың ноябрь 20-де, Тыва Республиканың Чаа-Хөл кожууннуң Чаа-Хөл суурга төрүттүнген. Томскиниң политехниктиг университединге «Үлетпүрнүң чылыг энергетиказы» мергежилди, Томскиниң удуртулга системазы болгаш радиоэлектроника университединге «Кризиске удур башкарыкчы» мергежилди база Сибирьниң күрүне албанының академиязынга «Юриспруденция» мергежилди чедип алган. Экономиктиг эртемнерниң кандидады.  
2002-2008 чылдарда К. Сагаан-оол Тыва Республиканың Тарифтер албанының специализинге, оон удуртукчузунга ажылдаан. 2008-2012 чылдарда ТР-ниң Энергетика болгаш үлетпүр яамызын удурткан. 2013 чылдан 2016 чылга чедир Чеди-Хөл кожуунунга чагырыкчылаан. Бо үеге чедир «Тываэнергода» ажылдап турар.

Возврат к списку