Закрыть
Логин:
Пароль:
Забыли свой пароль?

Войти    

Кызылда аварийлиг бажыңнардан хамаатыларны өскээр көжүрер программа-биле хөй квартиралыг 3 бажыңны дужааган

Кызылда аварийлиг бажыңнардан хамаатыларны өскээр көжүрер программа-биле хөй квартиралыг 3 бажыңны дужааган 15.11.2018
Ноябрь 14-те, Дружба кудумчузунда 26, 28, 30 «а» дугаарлыг чаагайжыды туткан 5 каът 3 бажыңны байырлыг байдалда ажыткан. 
Чуртталга-коммунал ажыл-агыйын эде чаартырын деткиир фонд – күрүне корпорациязының саң-хөө деткимчези-биле аварийлиг чуртталга бажыңнарындан хамаатыларны өскээр көжүрер программа боттаныышкыны-биле, найысылалдың Восток микрорайонунда хоорай поликлиниказының девискээринде, чаагайжыткан каът бажыңнарны туткан. Тывада база бир улуг тудуг организациязы «Энергострой» ону кылып дооскаш, хүлээткен.
 Беш каът үш бажыңда ниитизи-биле 4949,2 дөрбелчин метр шөлдүг 110 квартира бар. Бөгүн ынаар Лопсанчап, Рихард Зорге, Рабочая, Паротурбинная, Заводская, Полевая, Семирацкий, Оюн Күрседи, Механизация кудумчуларынга чурттап турган 238 кижи көжүп кирген.  
«Кызылдың Дружба кудумчузунда беш каът үш бажыңда квартираларның дүлгүүрлерин ээлеринге бөгүн тыпсып турарывыс бо. Шынап-ла, эрги бустур четкен бажыңга чурттап оргаш, чаа оран-савалыг апаарга, кымга-даа өөрүнчүг болур. Мен база силерниң-биле кады амырап тур мен. Аварийлиг бажыңнардан чонну көжүрер талазы-биле программаның боттандырылгазы бистиң республикада эки чоруп турар, барык 2600 өг-бүлелерни чаа оран-саваже көжүрген. Бо хире чараш, чаагайжыткан чаа бажың-балгадыңарны камнап, шевергин, арыг-силиг кылдыр тудуңар, ол бүгү силерден, чурттакчылардан кол хамааржыр. Силерниң бажыңынар – силерниң шивээңер-дир» – деп, Чазак Даргазы бажыңның чаа ээлеринге чагаан. 
Республика Баштыңының чагыын чаа бажың ээлери адыш часкаашкыны-биле деткээн. 
«Эртенгиниң мендизи-биле, байырымныг бо хүн-биле шуптуңарга байыр чедирип тур мен! Бистиң бичии күрүневистиң баштыңындан эгелеп алыйн, бо уттундурбас онза хүн дээш, улуу-биле четтирдим! Бо хүннү дыка үр манап келдивис, ам бажыңныг апаарывыска чуртталгавыс өскерлип, чаа болуушкуннар болур боор – деп, Медицинский кудумчузунга чурттап турган Альбина Викторовна Лебедева чугаалаан. – Тудуг яамызынга, мэрияга четтирдивис. Өөрүп, амырап, кожаларывыс-биле эптиг-демниг чурттаар бис».

Возврат к списку