Закрыть
Логин:
Пароль:
Забыли свой пароль?

Войти    

Тываның Баштыңының бирги оралакчыларында Александр Брокерт биле Шолбан Хопуяны томуйлаан

Тываның Баштыңының бирги оралакчыларында Александр Брокерт биле Шолбан Хопуяны томуйлаан 11.01.2019
Тываның Баштыңы Шолбан Кара-оол, январь 9-та, республика чазааның кежигүннеринге хамааржыр элээн каш кадрлар томуйлаашкыннарын дыңнаткан. 
«Республика Чазааның даргазының оралакчыларының ажыл-чорудулгазын сайгарып көргеш, оон-даа эки түңнелдерни чедип алыры-биле, шыңгыы негелдени тургузуп болур кижилерни мөөңнеп алыры чугула деп санап тур мен – деп, Александр Брокертти Тыва Республиканың Баштыңының бирги оралакчызы кылдыр томуйлаанын Тываның Баштыңы Шолбан Кара-оол тайылбырлаан. – Ол бирги оралакчы албан-дужаалы-биле чазактың экономиктиг политиказын элээн бедик болгаш шынарлыг деңнелге эккээринга дыка бүзүреп тур мен».  
Чазак Даргазының база бир бирги оралакчызынга Шолбан Хопуя томуйлаттынган. Ол бойдус камгалал адырын контрольдаары-биле кады республика Баштыңының айыткан даалгаларының боттанылгазын хыналдага алыр. 
Кызыл кожууннуң Төлээлекчилер хуралын даргалаан база сөөлгү ийи айда Тыва Республиканың Канцелярия удуртукчузунга ажылдаан Аяс Монге Тыва Республиканың Баштыңының оралакчызы албан-дужаалда томуйлаткан. «Сөөлгү үеде Аяс Норжукаевич муниципалдыг удуртукчулар ажылын дүүштүрери-биле холбашкан айтырыгларны идепкейлиг чорудуп эгелээн. Ооң эгелекчи чоруунга таарзындым – деп, Шолбан Кара-оол демдеглээш, иштики политика айтырыгларын харыылаарын дааскан. 
Мооң мурнунда ТР-ниң Өг-бүле болгаш уруглар херектериниң талазы-биле агентилел удуртукчузунга ажылдап турган Саида Сенгии күш-ажыл болгаш социал политика сайыдында томуйлатканын Тываның Баштыңы таныштырган.  
«Ам чаа тургузуглуг Өг-бүле болгаш уруглар херектериниң талазы-биле агентилел күш-ажыл болгаш социал политика яамызының тургузуунче чоорту каттыжа бээр ужурлуг. Чаартынган ведомство чазактың социал политиказын боттандырарынга идепкейлиг болгаш чедимчелиг ажылдаарынга идегээр мен. Яамыдан хөйнү манап турар бис» – деп, Шолбан Кара-оол дыңнаткан. 
Тываның Баштыңы чазактың социал политиказын база катап контрольга алырын бодунуң оралакчызы Органа Натсакка саналдаан. «Органа Доржуевна ол айтырыгларны кичээнгейге алыр боор – деп Шолбан Кара-оол демдеглээн. – Социал адыр сайыттарының ажылын мөөңнээринче онза кичээнгей негеттинип турарын көрүп тур мен».

Возврат к списку