Закрыть
Логин:
Пароль:
Забыли свой пароль?

Войти    

Tываның Баштыңы Конститусчу судту дүжүрер дугайында хоойлуга атты салган

Tываның Баштыңы Конститусчу судту дүжүрер дугайында хоойлуга атты салган 15.01.2019
Январь 11-де, Тываның Баштыңы Шолбан Кара-оол Конститусчу судту дүжүрер дугайында ТР-ниң Дээди Хуралының хүлээп алганы хоойлуга атты салган.  
Аңаа ат салган хүнден 10 хонук эрткенде, документ күш кирер. Судту дүжүрген соонда, аңаа көрүп турган шупту айтырыгларны, ооң иштинде республиканың Үндезин хоойлузунче өскерилгелер киирерин, федералдыг хоойлужудулгага даянып чорударын хоойлуда айыткан. 
Дүжүрген Конститусчу судтуң халажылгаже үнген даргазынга, секретарынга база судьяларынга республика бюджединиң акша-хөреңгизинден ай санының төлевирин төлээри көрдүнген. Тываның Чазаа халашкан судьяларга назынында бээр төлевирни тускай чурум-биле тодарадыр. 
Конститусчу судтуң ажыл чогу-биле ону дүжүрер дугайында саналды Шолбан Кара-оол боду идип үндүргенин сагындыраал. "Ажылдавайн акша алыр азырадыкчы хөөннү болбаан чок чорук деп санаар мен. Ынчангаш бо чоокку үеде, эрге-чагырга тургузуундан Конститусчу суд дээн ышкаш ындыг институтту ап кааптар хоойлу төлевилелин саналдап киирер мен» - деп, "Контактыда" арынынга ол дыңнаткан турган.  
Тываның Конститусчу суду 2003 чылда хевирлеттинген. Тургустунган үезинден бээр 53 билдириишкинни көрген. Ындыг болзажок, херек кырында судту тударынга республика бюджединден чылдың-на 30 хире млн рубльди чарыгдап турар-даа болза, бо сөөлгү чылдарда чаңгыс-даа материал көрбээн. «Акша чок үеде ындыг институтту тудары утка чок деп санаар» - деп, Шолбан Кара-оол судту дүжүрер дээн шиитпирин тайылбырлаан.

Возврат к списку