Закрыть
Логин:
Пароль:
Забыли свой пароль?

Войти    

Тываның Баштыңы биле Красноярск крайның губернатору: Ярыгин маргылдаазының тулган мөгези – Начын Куулар

Тываның Баштыңы биле Красноярск крайның губернатору: Ярыгин маргылдаазының тулган мөгези – Начын Куулар 28.01.2019
Тываның мөгези Начын Куулар хостуг хүрешке Иван Ярыгин аттыг ХХХ делегей маргылдаазының Гран-при шаңналы дээш бөлүүнге мөңгүн медальды чаалап алган. Январь 27-де, улуг-хүнде, маргылдааның албан езузу-биле хаашкыны болуп эрткен. 
Тываның Баштыңы Шолбан Кара-оол Интернет четкизи таварыштыр хүрешти көргеш, чедиишкинниг хүрешкени дээш Начынга байырын чедирген. Ярыгин маргылдаазының тулган мөгези кылдыр тыва мөге Начын Кууларны шилип алганы дээш, Красноярскиден коллегазы Александр Усска өөрүп четтиргенин бодунуң блогунда дыңнаткан.  
«Чаңгыс хемниң төлдери, сибирьжилер-дир бис! Красноярск крайның губернатору, мээң эжим Александр Викторович Усс, Начын Куулар дээш сеткилинден аарып, ону Ярыгин турнириниң тулган мөгези кылдыр чарлаан. Эш-өөрүмнүң деткимчези болгаш улуг дузазы дээш четтирдим! Маргылдаа адакталып турда, Александр Викторович-биле телефонга чугаалашканым соонда, Начынны 300 муң рубль акша-биле шаңнаар деп шиитпирлээн болду. Кончуг эки-дир! Бистиң оглувус база эр-хей! Олимпиадага киржир кылдыр ооң спортчу депшилгезин бурунгаарладыр дээш, кады дузалажыр бис!» - деп, республика Баштыңы соцчеткилерде бодунуң арынында бижээн.
 Россияның чыынды командазы маргылдаада 36 медальды чаалап алгаш, бирги черже үнген. Ийиги черде Моолдуң чыынды командазы – 15 медальдыг. 6 медальдыг Японияның командазы - үшкү черни ээлээн.

Возврат к списку