Закрыть
Логин:
Пароль:
Забыли свой пароль?

Войти    

Тывада Алтайның Национал шии театрының артистери аалдап келген

Тывада Алтайның Национал шии театрының артистери аалдап келген 12.03.2019
П. Кучияк аттыг Алтайның Национал шии театры Тываның найысылалында аалдап чедип келген. Шупту 33 кижи – кол режиссер, кол чурукчу, артистер база техниктиг ажылдакчылар алтай театрның делегейинче бистиң көрүкчүлеривисти хаара тудар.
 Тыва театрның коллективи коллегаларын хөөмей, дошпулуурга оюну, сүттүг шай база алгыш-йөрээлдер-биле уткуп алган. Алтайның Национал театрының коллективи март 15-ке чедир Кызылда Тываның хөг-шиии театрынга үш хонук дургузунда шиилерин бараалгадып, көрүкчүлерни өөртүр. 
Алтай театр орус дылда ийи шиини көргүзер. Март 12-де классиктиг комедия «Ревизорну» ойнаар. Тывада алтайларның келген программазының кол өзээ ол кежээ болур. Шии эгелээр мурнунда, Бүгү-российжи театр марафонунуң демдээ – Россияның шупту регионнарының сүлде демдектерин чураан челбиишти тыва театрга дамчыдар езулалды кылыр. Алтай Республиканың культура сайыды Ольга Антарадонова ону дамчыдар дээш, албан-биле Тывада чедип келген. 
Март 13-те өске шиизи-биле көрүкчүлерни өөртүр. Алтай театрның үндезилекчилериниң бирээзи Павел Кучияктың ынакшыл дугайында классиктиг төөгүлүг «Чейнеш» деп шиизи тыва көрүкчүге чоок болгаш таныш. Аныяк кыстар Кара биле Чейнештиң төөгүзү, «Хайыраан бот» деп шии-биле, дөмейлешкек. Ынчангаш театр уран чүүлүнүң үнелекчилери алтай дылда ол шиини четтикпейн манап турарлар. Ынакшыл, найырал, шын дээш демиселге, очулга херек чок. 
Алтай тыва дылдар төрелдешкек болгаш, ону билип алыры амыр. Алтай театр бичии көрүкчүлерге база белектиг келген. Март 14-те, Национал театрның сценазынга, «Торгу бийир» деп ойнаарактар шиизин орус дылда көргүзер. 
Театр марафонунуң эстафетазын Тываның күрүнениң ойнаарактар театры хүлээп алгаш, Иркутск облазынче «Братья – не разлей вода» база «Тойлу» деп шиилери-биле аъттаныптар.

Возврат к списку