Закрыть
Логин:
Пароль:
Забыли свой пароль?

Войти    

Кызыл - Курагино демир-оруун тудар төлевилел Тываның хөгжүлдезинде чаа үе-чада болур

Кызыл - Курагино демир-оруун тудар төлевилел Тываның хөгжүлдезинде чаа үе-чада болур 03.04.2019
Шолбан Кара-оол "ВКонтакте" социал четкиде бодунуң арынында, Кызыл-Курагино демир-оруун тудар талазы-биле төлевилел Тываның хөгжүлдезинге чаа арынны ажыдарын бижээн.
"РФ-тиң Чазааның даргазы Дмитрий Анатольевич Медведевтиң шиитпири Тывага хамаарыштыр ажылдың эгезин салган. РФ-тиң Экономиктиг хөгжүлде яамызынга бистиң Кызыл – Курагино демир-оруувус чиңгине тудугжулуг болган керээге атты салган. Ара турупкан тудуг төлевилелиниң кол айтырыы шиитпирлеттингени ол. Ону «Россияның демир-оруктары» ААН тудар. Бистиң рсепубликага хөгжүлдениң чаа үе-чадазы эгелээн» - деп, Тываның Баштыңы вторникте социал четкиге бижээн.  
Россияның демир-оруктары күчүлүг күрүне корпорациязының төлевилелде киржилгези, ажылдар эгелээринге магадылалды берген деп, Ш. Кара-оол идегелин илереткен.  
Апрель 1-де, «Россияның демир-оруктары» ААН-ның баштыңы Олег Белозеров биле «ТЭПК» АН-ның удуртукчузу Руслан Байсаров (Тывада Элегес хөмүр-даш чыдынын болбаазырадыр лизенциялыг - ИФ) Элегес - Кызыл – Курагино демир-оруун тудар дугайында дугуржулганы чарган. Документ езугаар, РДО төлевилел документациязын ажылдадып, айыттынган хөмүр чыдынынче шугумну туткаш, ажыглалче киирер. 
Демир-орук шугуму кокстуг хөмүр-даш чыдынын бүрүнү-биле болбаазырадыр арганы бээр. Чаа шугумнуң чаңгыс талазының узуну 410 километр. Орукту даглыг черлерге тудар болгаш, ниитизи-биле 11 км узун 8 тоннельди, 16 км узун 127 көвүрүглерни тудар. Поездилер тепловозтарны дажыыр. Төлевилелче 126,6 млрд хире рубль (2017 чылдың өртектери-биле, НДС чокка) инвестицияны салган, 4,5 чыл дургузунда тудугну доозар ужурлуг. Интерфакс

Возврат к списку