Закрыть
Логин:
Пароль:
Забыли свой пароль?

Войти    

Росавиация субсидия бээр даңзыже Кызыл-Москва-Кызыл рейсти киирген

Росавиация субсидия бээр даңзыже Кызыл-Москва-Кызыл рейсти киирген 03.06.2019
2019 чылдың июнь 6-дан эгелеп Кызыл - Москва аразынга дорт авиарейс ажыттынар. Чиигелделиг улуска билет өртээ 6100 рубль. Федералдыг агаар транспорт агентилелиниң шиитпири-биле, федералдыг бюджеттен субсидия бээр маршруттар санында Кызылче ужар москвачы рейс кирген. 
Тываның Баштыңы Шолбан Кара-оол социал четкилерде бодунуң арынында бир дугаарында ол медээни дыңнаткан. Чамдык ужудуушкуннарны организастаанын, каяа рейс катчы бээрин база сонуургаткан. «Кызылдан Москваже (Домодедово) ужар самолет-биле четверг база пятницада Анапаже улаштыр, азы ол-ла маршурут-биле дедир ужуп кээп болур. Улуг-хүн - понедельникте Кызылдан Жуковский (Москва) аэропорт таварыштыр Симферопольче углай ужуп болур. Ону шөлээлер үезинде тускайлаан. Кара далайга дыштанырын планнап алган чаңгыс чер-чурттугларывыска дыка эптиг!” – деп, ол бижээн. 
Тыва ИрАэро компания-биле дугурушканы езугаар, Кызыл – Москва рейзин 2018 чылдың декабрьда эгелээнин сагындыраал. Росавиациядан маршуртту субсидия алыр черлер санынче кииреринге ынчан ол “чөпшээрел” албаан. Ындыг болзажок, республика чазаа регион бюджединден дотация-биле хандырып, рейсти арттырып ап шыдаан. Ам рейсти федералдыг деткимче программазынче киирген.  
Эвээш хандырылгалыг хамаатылар – студентилериниң, пенсионерлерниң, кадыкшыл байдалы кызыгаарлыг кижилерниң база хөй ажы-төлдүг өг-бүлелерниң аай-дедир шимчээшкинин деткиир дээш, авиааргажылгаларга субсидияларны киирген. Ынчангаш тускай тарифти чамдык категорияның хамаатыларынга, 23 хар чедир аныяктарга, 55 хардан өрү назылыг херээжен, 60 хардан өрү назылыг эр кижилерге тускайлаан. 
Оон аңгыда, 1-ги бөлүктүң инвалидтери, ийиги база үшкү бөлүктүң чажындан инвалидтери, оларны үдеп чоруур кижилер субсидиялыг билеттерни садып ап болур. Документ езугаар хөй ажы-төлдүг болза, ол өг-бүлелерниң кежигүннери Москва рейзинче чиигелделиг ужуп болур. 
Тываның эрге-чагыргазы регион аргыжылгазынга субсидия бээр федералдыг программаның ачызында, бодунуң аэропорту таварты регионнар аразының 4 маршрудунда доктаамал ужуп эгелээн. Москвадан аңгыда, Кызылдан Иркутск, Красноярск база Новосибирскиже самолёттер ужар.
 Шолбан Кара-оол база бир агаар оруу удавас немежирин дыңнаткан. Тываның Чазаа чоннуң агаар-биле аргыжылгазын экижидери-биле, Кызыл- Санкт-Петербург деп дорт авиарейсти ажыдар дээш күжениишкинниг ажылдап турар.

Возврат к списку