Закрыть
Логин:
Пароль:
Забыли свой пароль?

Войти    

Тыва эскадроннуң сөөлгү дайынчызын үдээн

Тыва эскадроннуң сөөлгү дайынчызын үдээн 25.07.2013
Ада-чурттуң Улуг дайынынга немец-фашизм-биле дайылдажып, бөгүнгү тайбың чуртталганы камгалашкан тыва эки турачыларның аъттыг эскадронунуң сөөлгү дайынчызы Вера Чулдумовна Байлакты сөөлгү орукче үдээриниң езулалы Алдан-Маадыр аттыг Национал музейге эрткен. Эрес-маадырлыг дайынчы, эрес-кежээ ажыл-ишчи өгбези-биле байырлажып алыр дээш дайынның болгаш күш-ажылдың хоочуннары, Тываның найысылалы Кызыл хоорайның чурттакчылары, кожууннардан келген чон, күш-ажылчы коллективтерниң болгаш хөй-ниити организацияларның төлээлери чедип келген.

Тываның Баштыңы Шолбан Кара-оол маадыр иениң уругларынга, чоок төрелдеринге, чонунга бодунуң болгаш республиканың удуртулгазының мурнундан ханы кажыыдалды илереткеш: «Бистиң эрес-маадырлыг эневис ам-даа үр чурттаарын күзеп чораан мен – деп чугаалаан. – Дайын-чааның бергелерин деңге эртип, өлүм-чидимни кады көрүп чораан дайынчы эш-өөрүм чокта меңээ чурттаары берге-дир, ынчалза-даа оларның дугайында тураскаалды кадагалап, оларның маадырлыг чоруунуң дугайында сактыышкынны аныяк салгалдарга дамчыдып берип чурттаар ужурлуг мен деп чугаалаар кижи».

Вера Чулдумовна-биле кады Украинага чедип, тыва эки турачыларның дайынчы оруктары-биле чораанын, немец-фашизмни тиилээнинге тыва чоннуң, Тыва Арат Республиканың киирген улуг үлүүн көргүскен Москвага ажыттынган Тиилелгениң делгелгезиниң ажылынга улуг өгбези-биле кады киришкенин Шолбан Кара-оол сактып чугаалаан.

Эки турачы тыва аъттыг эскадроннуң сөөлгү дайынчызы Вера Байлакты шериг езу-биле сөөлгү орукче аъткарган– кызыгаар шерииниң хүндүлел караулу ону орнукшудар черинге чедир Тываның Чазааның үрер хөгжүм оркестриниң күүсеткени чарлыышкынның аялгазының адаа-биле үдээн.

Эрес-маадырлыг дайынчыга, эрес-кежээ, ажыл-ишчи иеге ооң сөөлгү оруун дургаар чон аңаа мөгейип, хомудалын, чоргааралын илередип турган.

Возврат к списку