Закрыть
Логин:
Пароль:
Забыли свой пароль?

Войти    

«Сибирьниң өнчүзү» — Айслу Лаажапта

«Сибирьниң өнчүзү» — Айслу Лаажапта 04.12.2013
Кызылдың Интернационалчы дайынчылар аттыг № 12 школаның орус дыл болгаш литература башкызы Айслу Лаажап «Сибирьниң өнчүзү» Хүндүлүг Алдын демдээниң Кавалери атка төлептиг болган.

Сибирьниң тергиин башкыларының байырлыг чыыжы Иркутск хоорайның «Кортъярд Мариотт» аалчылар бажыңының бизнес-төвүнге болган. «Өөредилгениң дээштиин бедидери – Сибирьниң социал-экономиктиг хөгжүлдезиниң байдалы» байырлыг хемчег IV Сибирьниң өөредилге ажылдакчыларының съездизинге дүүштүр эрткен. Аңаа Ханты-Мансийск АО-дан Забайкальеге чедир Сибирь федералдыг округтуң 13 регионундан 800 ажыг кижи киришкен.

Ол хуралга «Сибирьниң өнчүзү» Хүндүлүг Алдын демдээн 11 төлептиглерге тывыскан. Сибирьниң аңгы-аңгы регионнарының башкыларының аразындан Айслу Лаажап «Эртем болгаш өөредилге» деп номинацияга хамааты кижиниң мөзү-бүдүжүн болгаш идепкейжи амыдыралчы туружун хевирлээринче угланган өөредилге-кижизидилгелиг программаларны ажыглааны база ажылдап кылганы дээш ол хүндүлүг атка төлептиг болган. Айслу Евгеньевна Лаажап — республика чергелиг «Чылдың башкызы-2013» мөөрейниң тиилекчизи.

«Сибирьниң өнчүзү» шаңналды регионнар аразының «Сибирьниң дугуржулгазы» ассоциациязы биле «Хөй-ниитиниң үнелээшкини» Национал фонд кады тургускан.


Возврат к списку