Закрыть
Логин:
Пароль:
Забыли свой пароль?

Войти    

Талантылыг аныяктарга шаңналдар

Талантылыг аныяктарга шаңналдар 27.12.2013
Дүүн, декабрь 25-те, ТР-ниң Чазаанга РФ-тиң Өөредилге болгаш эртем яамызының, Тыва Республиканың Баштыңының дипломнарын талантылыг аныяктарга тывыскан. Ук хемчегни Тыва Республиканың «Өөредилге» мурнады хөгжүдер национал төлевилелдиң «Талантылыг аныяктарга күрүне деткимчези» угланыышкын-биле организастап чоруткан.

Тыва Республиканың Баштыңы — Чазааның Даргазы Шолбан Кара-оол онзагай, салым-чаяанныг, талантылыг, эки өөредилгелиг уругларга деткимчени көргүзүп, шаңнал-макталды тыпсыры канчаар-даа аажок өөрүнчүг болгаш чоргааранчыг-дыр дээрзин чугулалап демдеглээн. Чазак Даргазының чугаалап турары-биле алырга, бо хүн чыглып келген аныяктар тергииннерниң тергииннери дээрзин утпас болза эки.

«Бистиң ажы-төлүвүстүң республиканың, Россияның болгаш делегей чергелиг мөөрей, олимпиадаларның тиилекчилери болуп, шаңналдыг черлерни чаалап алганы дээрге-ле, оларның башкыларының, ада-иелериниң улуг үлүг-хуузу. Федералдыг яамының шаңнал-деткимчезин — грантызын чаалап алыр дээш республикадан кордакчылар киришкен. Негелделер езугаар, бирээде, оларның тергиин өөредилгезин, ийиде, эртем ажылының төрээн чуртунуң хөгжүлдезинге, алызы барып, ажыктыг болурун болгаш чаа чүүлдерниң кирип турарын өөренип көргеш, түңнээн. 2006 чылдан тура, бо төлевилелге бистиң республикадан ниитизи-биле 233 кижи киришкен. Оларның амгы үеде амыдыралчы оруун тодарадып кээривиске, барык шуптузу Россияның шыырак дээди өөредилге черлеринде өөренип, делегей чергелиг олимпиадаларга тиилеп, РФ-тиң Президентизи турган Дмитрий Медведевтиң-даа шаңналдарын ап турган болган. Бо уруглар база, алызы барып, төрээн Тывазының экономиктиг хөгжүлдезинге үлүүн киирерлер» — деп, Шолбан Кара-оол чугаалаан.

РФ-тиң Өөредилге болгаш эртем яамызының (РФ-тиң өөредилге, эртем сайыды Дмитрий Ливановтуң ат салганы) талантылыг аныяктарга деткимче талазы-биле 10 муң рубль түңнүг шаңналын республика чергелиг олимпиаданың киржикчилери — өөреникчилер Күдер Айыжы, Андрей Иванов, Александр Лопатин дээш, өскелер-даа чаалап алган. Ол ышкаш ук шаңналга студентилер аразынга профессионал уран чүүлге республика чергелиг олимпиаданың тиилекчизи Ирина Мананникова, ча адарының талазы-биле олимпиаданың тиилекчизи Чаян Монгуш дээш, өскелер-даа төлептиг болган.

Тыва Республиканың Баштыңының 20 муң рубль түңнүг грантызын аңгы-аңгы номинацияларга Барыын-Хемчиктиң Кызыл-Мажалык суурунуң №2 школазының өөреникчизи Ирина Хомушкуга, Кызылдың №14 школазындан Евгений Ковитога, ТР-ниң күрүне лицейиниң өөреникчизи Долаана Кууларга, Ак-Довурактың №4 школазындан Айлана Сарыгларга, Кызылдың №1 школазындан Белекмаа Тас-оолга дээш, өскелерге-даа тывыскан.

Республика Чазааның шаңналының лауреаттарындан аңгыда, Тываның Баштыңының 300 муң рубльдиң грантызын техниктиг чогаадылга дээш республиканың немелде өөредилге төвү чаалап алган.

Өөредилге болгаш эртем сайыды Каадыр-оол Бичелдей шаңнал-макталга төлептиглерге болгаш оларның залда чыглып келген башкыларынга, ада-иелеринге байыр чедирген. Ажылынга көскү түңнелдерлиг башкыларга өөредилге сайыды шаңналдарны тывыскан.

Алдынай Бады-Хоо.
"Шын" солун 

Возврат к списку